وحدي في المطبخ
جربتي
تقفي في المطبخ لوحدك كل حاجه تحت تصرفك ملاعق عرفه عددها أطباق من كل نوع
تعرفي تغرفي الرز في المسطح وتعمليه بشكل مكبب وعليه عود من الخضره طب
والشوربه في ماج شيك واسع طب والسلطه في بولات صغيره والمحشو في أطباق
مسطحه علشان يبرد طب واللحمه أه اللحمه عشان غليت يعني
بردوا ليها سرفيس لما تبقى تيجي نبقى نحطها في السرفيس طب والصواني اشي
صنيه للكيكه وصنيه للمكرونه بالباشميل وصنيه للبيتزا وطبعا كل صنيه بالمقاس
حسب الكميه طب ده كمان فيه حلل ألمونيوم وصاج وتيفال وبايركس طب استعمل كل
ده في ايه أطبخ في اي حله من دول طب ده في كوبايات وكاسات زجاج طويل وقصير
حاسبي عليها لا تقع منك مكتوبه في القايمه بتاعة ماما أو بتاعتك .
أول مره أقف في المطبخ لوحدي مطبخ عباره عن قطع من الألمونتال الفضي
وفورمايكي ككاوي ألوان تفرح طب هطبخ ازاي المهم طبعا فيه حوض خاص بالأواني
وبه تربو الخزين ومريلة المطبخ والبوتاجاز والثلاجه
و
باسكت الزبالة كل اللازم للمطبخ طب كانت ماما بتقولي أقشر أد ايه ثوم على
ما اللحمه تستوي عدد كوبايات الرز ؟ أعمل الرز في الحله دي ولا دي طب أولع
الشعله بتاع البوتجاز الصغيره ولا الوسط ولا
الكبيره ولا أي وحده بتسوي كل حاجه غريبه عليه متعوده على وجود حد معايا في
المطبخ ينبهني لأي حاجه يعني حنفيه مفتوحه جمبي (ماما بتغسل شوية مواعين )
عادي . صوت حلل بتتخبط عادي ( ماما بتجبلي الحلة ال هعمل فيها ) مريحاني .
صوت أطبق زجاج غويطه (عشان أغرف فيها ) بتعمل ال عايز يتعمل طب كل ده أعمل
فيه ايه وأنا لوحدي أفتكره على بعضه ولا وحده وحده ؟ مش مهم المهم أعرف
أعمل الأكل الناس بقالها ساعة مستنيه الأكل وأنا واقفه ألف في المطبخ بدور
على الحلل . طبعا (مسئولية الوقوف في المطبخ) قررت أكون مسئولة نفسي أحدد
الحلل والأطباق والمعالق والكميات ونوع الأكل كمان ودا كان الحل جبت كتاب
أبله نظيره وبدأت بصفحة الوفيات قصدي صفحة الملوخيه وعلى فكره الكتاب فيه
طريقة ترتيب السفرة وشكليات الطعام ومقادير الأطعمه وكل الأكلات الجميله (
انتوا ريقكوا جري ) طبعا سيرت الأكل بتجوع يلا كفايه عليكم كده المهم
اعتمدت على نفسي وأنا في المطبخ لوحدي أسيبكم بقى زمان المحشو استوى سلام